|
జల జలా జారెడి కాల వాహిని లోన తెలియకే సాగెడి ధార యీ జీవితం. ||జల జలా|| 1. గతమనే హిమ శైల గంగా ప్రవాహములా, గతు లెన్నో మారుచు, గతి తోటి కదలుచూ, మది స్మృతుల మలుపులతో ముందుకు ఉరుకుచూ సతతము సాగెడి సరిత్తు యీ జీవితం. ||జల జలా|| 2. కష్టముల కొండలపై కదమును త్రొక్కుచూ, నష్టముల రాళ్ళను ఢీ కొని సాగుచూ, ఇష్టమను పూవనుల ఇంపుగా మరలుచూ, పుష్టిగా సాగెడి - ప్రవాహమే జీవితం. ||జల జలా|| 3. సుఖ, దుఃఖ సంధ్యలలో సతతమూ సాగుచూ, పగలు, రేయని లేక పయనము చేయుచూ, శగలు, పొగలను దాటి శ్రమలను ఓర్చుకొని, ఆగక సాగెడి అలుగు యీ జీవితం. ||జల జలా|| 4. మత్తు గొలిపెడి మధుర మమతలను అలలతో ఎత్తుగా ఎగురుచు చిత్తుగా ఓడుచూ, ఎత్తులో ఉన్న ఆ ఏడుకొండల వాని హత్తుకొని పదములపై ఆగు నీ జీవితం. ||జల జలా|| చాకలకొండ రమాకాంతరావు June 1, 2007 Cincinnati OH USA |
|
#maa telugu talliki mallepU daMDaa# |