|
పరుల ఆనందము పంచుకొన జాలని నరుల జీవనము నికృష్టమే గదా! సిరుల తుల తూగుచు సాటి వారుండగ పరితాప మొందుట పామరత్వమే గదా! ||పరుల|| 1. సాయి సాయి యంటూ సాధనలు చేయుచూ నెయ్యము మరచుట నీచత్వమే గదా! హాయిగ పెండ్లిండ్లు, పబ్బముల పాల్గొనని, దాయాది మత్సరము దీనత్వమే గదా! ||పరుల|| 2. ప్రేమ, కరుణలు రెండు పెదవికే వదిలేయు, ధర్మ వర్తన లేమి దైత్య గుణమే గదా! నామ మాత్రమే నోరు నారాయణ యనుచు కామముల కృంగుట కఠినత్వమే గదా! ||పరుల|| 3. చిరునగవులు చింద చెలిమిగ పలికెడి ధీరుల హృదయ ద్యుతి దైవత్వమే గదా! తిరువేంకటేశుని తత్వముగ భావించి పరులతో మెలగుటే ప్రేమ తత్వము గదా! ||పరుల|| రమాకాంతరావు చాకలకొండ July 8, 2007 Cincinnati OH USA |
|
#maa telugu talliki mallepU daMDaa# |