|
పల్లవి. కొమ్మలిద్దరి మధ్య కులికేటి ఓ స్వామి! అమ్మ లిద్దరి తోటి అగుపించ వేమి? ||కొమ్మ|| అనుపల్లవి. ఇమ్ముగ భామలతో ఇచ్చగించెడి స్వామి! కమ్మగ ఒక పరి మాట్లాడ వేమి? ||కొమ్మ|| 1. కమ్ముకొని మేఘములు కన్నులలో నిండగ, తిమిరములు తొలగించి కాపాడ వేమి? నమ్మకముగ నిన్ను కొల్చేటి భక్తులు, రమ్మని పిలువగ అరుదెంచ వేమి? ||కొమ్మ|| 2. సొమ్ములెన్నో వేసి సొగసు చూపెడి స్వామి, సొమ్మేది పోదులే దరికి రావేమి? రమ్ము రమ్మని పిలువ, బిగువు చూపెద వేమి, నెమ్మిగ మాపైన దయ జూప వేమి? ||కొమ్మ|| 3. కిమ్మనక మంగమ్మ కొంగు బట్టిన స్వామి, అమ్మచెల్ల యింత నయగార మేమి? ఇమ్ముగ సప్తగిరి నెంచి వెలసిన స్వామి, ఇమ్ముకొని గుండెలో నెలవుండ వేమి? ||కొమ్మ|| 4. బొమ్మలాటల యీ బ్రతుకు నాటకములో మమ్ములను ఆడించి తిలకింతు వేమి? కుమ్ములాటల యీ బ్రతుకు పోరాటములో, సొమ్మసిల్లిన మాకు శరణీయ వేమి? ||కొమ్మ|| ఇమ్ము = స్థానము, ఇమ్ముకొను = వశించు రమాకాంతరావు చాకలకొండ January 3, 2008 |
|
#maa telugu talliki mallepU daMDaa# |