|
పల్లవి. అందమంటే ఏదిర? ఆనంద మంటే ఏదిర? కందువగ అది ఎందునుందో, కన్ను విప్పి చూడర. ||అందమంటే|| అనుపల్లవి. ముందు నున్న ముదిత మోమున? పొందు లోనో దాగి ఉన్నాదా? డెందమున వివరింప జేసి, పొందు కాంక్షను జేయర. ||అందమంటే|| 1. చక్కదనపు మేని సొగసులు, చిక్కిపోయి శల్యమైన, పొక్కి రోగపు పుట్టయైన, దిక్కు లేని దేహమందు, ముక్కి మూల్గెడి మేని యందు, సొక్కి సోలెడి కాయమందు నక్కి ఉన్నదా చూచు అందము, చిక్కు మానవ! విప్పర.||అందమంటే|| 2. లెక్కలేని నోట్ల కట్టలు, డొక్కుమూటలో దాచు నగలు, అక్కరకు యిక అందిరాక, చిక్కులోన ముంచు వేళ, టక్కు మారి లోకమందు, టెక్కు టాకుల సంపదందు ఎక్కడున్నది సౌఖ్యము, నొక్కి చెప్ప వేమిర! ||అందమంటే|| 3. ప్రక్క నున్న దాని మరచి, ఎక్క డెక్కడో వెతకి చూచి, సొక్కు ఆశల సాగరములో, వెక్కి ఏడ్చెడి సోదర, మక్కువగ శ్రీ వేంకటాదిపై, మ్రొక్కినంతనే మోక్షమీయ, వెక్కసంబుగ వెలసి ఉన్నది, దిక్కు నీకదే కాంచర. ||అందమంటే|| రమాకాంతరావు చాకల కొండ January 6, 2008 |
|
#maa telugu talliki mallepU daMDaa# |